معلومات عن المنحه ITI

السلام عليكم ورحمه الله وبركاته

ازيكم جميعا يارب تكونوا بخير

ان شاء الله البوست ده هتلاقوا فيه معلومات عن المنحه ويارب نقدر نفيدكم بيها :

1- ايه المنحة دي بتتكلم عن ايه ؟
===================
هتلاقوا تفاصيلها في الفايل ده ، بشمهندسة نور كانت منزلاه :

2- طب ايه شروطها ؟
============
# شروط عامة:
1- خريجى جميع الكليات من الجامعات المصرية دفعة اخر 5 سنوات.2012-2016)
2- التقدير التراكمى لا يقل عن جيد. (ماعدا تراكين game arts - game development بياخدو من مقبول )
3- الحصول على شهادة التوفل TOEFL بحد أدنى 550 درجة (ويمكنكم تقديمها بعد اجتياز اختبارت المنحة المؤهلة ولكن شرط التحضير والدراسة ).
4- اجتياز الاختبارات المؤهلة للبرنامج.
5- التفرغ الكامل أثناء فترة التدريب.
((ايه ده يعني لازم توفل؟)) ,, لا مش لازم ممكن تقدم وتدرس في المنحة من غير التوفل بس مش هتعرف درجاتك في المواد كلها الا لما تقدم شهادة التوفل ، يعني ممكن تقدم من غيرها عادي وتتخرج من غيرها كمان .

ثانيا - التقديم :
حضرتك تقدر تقدم ف اى وقت انت عايزه التقديم مفتوح لحد اول شهر 9 بمعنى ان حضرتك ممكن تدخل تسجل بياناتك وترفع الورق بتاعك ومش تختار التراك غير لما تكون جاهز ... لانك اول ما بتختار التراك بيتحددلك معاد امتحان ممكن يكون بعدها بيوم او يومين او اكتر حسب العدد اللى مقدم

حد هيجى يسأل ويقول يعنى انا لو رفعت الورق وقفلت الموقع كده الورق طار من ع الموقع لا حضرتك الويب سايت بيخزن كل حاجه انت بتعملها عليه اهم حاجه مش تختار التراك غير لما تكون جاهز للامتحان

1- معاد التقديم فتح وهيقفل ان شاء الله 9/1

2- الاوراق المطلوبه :
* شهاده التخرج او الشهاده المؤقته او بيان دراجات فيه التقدير العام
* البطاقه
* صوره شخصيه
* موقفك من الجيش بالنسبه للشباب

- الحاجات ده بتتسحب اسكانر وبعدين بتترفع ع الموقع وبتستنى حضرتك لحد ما المسئولين بيتاكدوا من البيانات .. ف الفتره ده الورق بتاع حضرتك ع الويتنج .. الويتنج ممكن ياخد وقت يوم او يومين ع حسب الضغط وممكن اققل من كده ف الناس مش تستعجل تتابع الاكونت بتاعها بس ولو ف اى مشكله تقدر اسكرين شوت وحطها ع الجروب و ان شاء الله نقدر نفيد حضرتك فيها

ده لينك التقديم ان شاء الله

http://www.iti.gov.eg/Site/Registration
- بالنسبه لاختيار التراك : حضرتك خلاص جاهز وعايز تمتحن حضرتك بتدخل ع الاختيارت وتبدا تختار :

1- ممكن حضرتك تختار تراك واحد بس وممكن تختار اكتر من تراك ... بس الافضل ليك انك تختار اكتر من تراك عشان فرصتك ف القبول بتبقى احسن

2- حضرتك ممكن تختار التراك ذات نفسه اكتر من مره ف اكتر من فرع

3- حضرتك ممكن تختار اكتر من تراك ف اكتر من فرع .. حد هنا هيسئل ويقول طيب انا هعمل انترفيو تيكنكال ف انهى فرع .. ده حضرتك بتتحدد ع حسب التراك لو انت مختار تراك ف فرع القاهره والتراك ده مش موجود غير ف فرع القاهره وتراكات تانيه ف فروع تانى ف ان شاء الله هتمتحن كل التيكنكال ف فرع القاهره
يعنى ف كل الاحوال انت بتمنحن ف مكان واحد التيكنكال مش اكتر من مكان

4- بعد ما اختارت التراك خلاص وفجاءه فكرت انك تغير التراك ... اه حضرتك تقدر تغير التراك عادى جدا يوم الانترفيو الصبح مفيش مشكله

كده غالبا التقديم خلصنا كلام عليه .

ثالثا :الامتحانات ال IQ و ال English

1- اول حاجه مهمه IQ :

كتاب الـ501 من اول set 1 لحد set 26
هترتاحوا ان شاء الله لما تجمعوا كل الافكار الحاجات جت بالنص ..
ومن كتاب الـultimate ذاكروا لحد تيست 10 .. الاشكال الهندسية والتظليل والكلام ده كله موجود فى الـultimate من اول تيست 1 لحد تيست 10

* الكتب ده هتلاقوها ع الجروب ف كلمه files اللى فوق .
* قبل ما تعمل اسكرين شوت من السؤال اللى متعرفش اجابته ادخل ع ال photo هتلاقى ناس سئلت نفس السؤال قبل كده وهتلاقى الاجابه بتاعتها .
* حاول دايما تعمل سيرش ع الاجابه قبل ما تسئل حد هتستفاد كتير اوى بالذات لو اتقبلت ف المنحه .

2- تانى حاجه مهمه ال English :

الامتحانات من الويب سايت ده :
…

اللي عايز يتدرب على اسئلة ال Comprehension بردو من نفس السايت ، هتلاقي اسئلة كتير على القطع بمستويات في اللينك ده:
…

* وهتلاقوا ملف اسمه بيسان موجود بردو ف files بتاعت الجروب هيساعدك ف الجرامر كتير اوى

رابعا التيكنكال :

اهم حاجه بقى ف التيكنكال انك المفروض بتختار التراك اللى حضرتك عايزه بمعنى ايه .. يعنى مينفعش حد يدخل يقول انا خريج كذا وياريت حد يقولى انسب تراك ليا ايه ... لا مفيش الكلام ده هنا ف المنحه ... ببساطه اول سؤال هتتسئلوا انت ليه اختارت التراك ده ... فمش هينفع حضرتك ترد وتقول اصل والله ف واحد صاحبى قال عليه كويس .. ايوه يعنى كان دور حضرتك ف الاختيار ايه ضيف شرف .. اكيد لا
انت بتختار ع اساس انت بتفهم ف ايه ... دراستك ايه ف الكليه .... انت حابب تشتغل ايه ... كل ده حضرتك لازم تحددوا مش حد تانى ..

ده لينك خاص بكل التراكس اللى موجوده ف المنحه حضرتك بتدخل تقرا المحتوى بتاع التراك وبعدين بتختار التراك اللى انت عايزه اى حاجه عايز تسئل عليها بخصوص حاجه معينه ف تراك مفيش مشكله

هنا جروبات خاصة بكل تراك ، اعمل Join للجروب بتاع تراكك .. وزاكر تكنيكال مع زمايلك
خامسا: السوفت اسكيلز :-

ياريت الناس تشوف الحاجات اللى موجوده ف اللينكات اللى موجوده هنا وتحاول تفهم ازاى هى هتبقى مؤهله ... بمعنى انى مش طالب من حضرتك تحفظ بالنص ايه اللى بيتقال لا حضرتك بتبقى ع طبيعتك خالص وبترد بالرد اللى انت شايفه صح وياريت مش عايزين نفتى لو مش عارف قول مش عارف مفيش مشكله مش تحفظ اجابه او تحاول تصطنع حاجه مش بتاعتك عشان هما بيعرفوا ده كويس جدا وبيعرفوا بردوا انك بتكدب ف الاحسن تخليك ع طبيعتك وان شاء الله خير

# سوفت سكيلز :
شوف الفيديو ده هيساعدك تحضر نفسك للانترفيو:

تجميع لاسئلة السوفت سكيلز بالعربي والانجلش

اللينك ده كمان مهم للناس ((تجارب امتحانات وانترفيوها تكنيكال وسوفت 2015)) هتلاقوها في اللينك ده :

وال page ده مهمه بردوا ان شاء الله تفيدكم

ده لينك بردوا هيفيد الناس اللى محتاجه تعرف ازاى تبدا وتعمل ايه

سادسا : الفاينال ان شاء الله ربنا يكرم بيه اللى يستحقه :-

- اسئله عاديه جدا يعتبر دردشه مش بياخد وقت مش محتاج تذاكر حاجه ليه بيبقى عباره عن اسئله شخصيه مفهوش اى مشكله خالص .

--------------------------------------------------------------------------------------------------

حاجات مهمه بقى الناس لازم تعرفها

1- مفيش بوست متكرر ان شاء الله هيتوافق عليه بمعنى ان اى حد عنده مشكله ف حاجه يحاول يشوف البوستات اللى موجوده ف الجروب الاول ولو مش لاقى اجابه يعمل بيها بوست .. بس لو البوست بتاع حضرتك اتاخر ولقيت بوست تانى نزل اعرف ان البوست بتاعك متكرر واحنا مش هنوافق عليه ... مش بنرخم عليك بس بنحاول نوصلك لمفهوم اسمه السيرش .. حضرتك لو ربنا اراد واتقبلت هتفهم احنا ليه بنعمل كده

2- مفيش حاجه اسمها انا اتاخرت ومش هلحق لا حضرتك ركز وان شاء الله هتلحق لسه بدرى جدا جدا جدا مفيش اى مشكله خالص ف اى حاجه المهم تبدا وتبذل مجهود مضاعف عشان توصل للى انت عايزه

3- ياريت الناس متخليش الهدف بتاعها المنحه بس لا لو لقدر الله مش اتقبلت كمل ف المجال اللى انت عايزه ولو احتجت اى حاجه ان شاء الله هنبقى معاك ونساعدك المهم يكون عندك النيه وانك تسعى

4- اى تاخير ف اى حاجه بيبقى غصبن عننا مش بايدينا احنا موجودين هنا عشان نساعدكم وان شاء الله نكون عند حسن ظنكم

بالتوفيق ليكم جميعا اسف ع الاطاله ... ده هيبقى البوست المثبت ان شاء الله اى حد هيعوز حاجه يكتب ف كومنت لان عايزين البوست ده يبقى ف اكتر تجمعيه لاسئله الناس ف الكومنتات بتاعته عشان يبقى مرجع لغيرك ومش يتعب ف ان هو يقعد يدور ع بوست انت كنت عامله قبل كده ف الجروب عشان يعرف معلومه